ولّا دخول شركة علي بابا لبورصة نيويورك -وول ستريت- أكبر دخول لشركة فالتاريخ، بقيمة وصلات ل 25 مليار دولار. بعدما زادوا البنوك اللي مسؤولين على إجراءات هاد الدخول يوم 22 سبتمبر 2014 عدد الأسهم المطروحة ب 15 فالمية بسعر 68 دولار للسهم. وهاكدا حطمات علي بابا الرقم القياسي اللي كان عند البنك الزراعي الصيني بعملية دخول وصلات ل 22.1 مليار دولار عام2010

البنوك اللي كانت مسؤولة على هاد العملية واللي أهمها: كريدي سويس، دويتشي بانك، غولدمان زاكس، جي بي مورغان تشيس، ومورغان ستانلي خداو تقريبا 300 مليون دولار كأتعاب

للإشارة علي بابا هي أكبر شركة للتجارة الإلكترونية فالصين، أسسها أستاذ ديال اللغة الانجليزية اسمو جاك ما عام 1999 برأسمال ديال 60 ألف دولار وبعد هاد الشي غيولّي أغنى رجل فالصين بثروة كتوصل ل 26.5 مليار دولار. ومن الأقوال ديالو المشهورة ملي كانت شركة إي باي قررات تنافسو على سوق التجارة الإلكترونية فالصين: « إي باي تقدر تكون قرش فالمحيط، ولكن أنا تمساح فنهر يانغتسي »، وهاد الشي اللي وقع بعد ما سجلات إي باي خسائر فادحة فالصين وانساحبات